आळवे, ता. पन्हाळा, जि. कोल्हापूर :
विद्या मंदिर आळवे (ता. पन्हाळा, जि. कोल्हापूर) येथील विद्यार्थ्यांनी इयत्ता सहावी विज्ञान प्रज्ञाशोध परीक्षेत उल्लेखनीय यश संपादन करत शाळेच्या शैक्षणिक गुणवत्तेचा ठसा उमटवला आहे. या परीक्षेत शाळेच्या एकूण ९ विद्यार्थ्यांची जिल्हा स्तरासाठी निवड झाली असून हे यश शाळेसह संपूर्ण आळवे गावासाठी अभिमानास्पद ठरले आहे.
जिल्हा स्तरासाठी निवड झालेल्या विद्यार्थ्यांमध्ये
कु. वेदांती सरदार कुंभार, कु. श्वेता सरदार लाड, कु. अबोली सचिन पाटील, कु. वेदांती विजय पाटील, कु. दुर्वा सतीश चौगले, शौर्य शिवाजी गायकवाड, साईराज सुभाष पाटील, अरमान अस्लम अत्तर व निरंजन भिकाजी यादव यांचा समावेश आहे.
या सर्व विद्यार्थ्यांनी विज्ञान विषयातील मूलभूत संकल्पनांचे उत्तम आकलन, निरीक्षणशक्ती, तर्कशुद्ध विचार आणि सातत्यपूर्ण अभ्यासाच्या जोरावर हे यश प्राप्त केले आहे. ग्रामीण भागातील विद्यार्थ्यांनी विज्ञान प्रज्ञाशोधसारख्या स्पर्धात्मक परीक्षेत मिळवलेले हे यश इतर विद्यार्थ्यांसाठी प्रेरणादायी ठरत आहे.
या यशामागे विद्यार्थ्यांची मेहनत, त्यांना मिळालेले मार्गदर्शक शिक्षकांचे शिस्तबद्ध व अभ्यासपूर्ण मार्गदर्शन, शाळेचे मुख्याध्यापक यांचे नेतृत्व, तसेच शाळा व्यवस्थापन समितीचा सातत्यपूर्ण पाठिंबा मोलाचा ठरला आहे.
या उल्लेखनीय यशाबद्दल शाळेचे मुख्याध्यापक, सर्व शिक्षकवृंद, शाळा व्यवस्थापन समिती, पालकवर्ग तसेच आळवे गावातील सर्व ग्रामस्थांनी विद्यार्थ्यांचे मनापासून अभिनंदन केले असून जिल्हा स्तरावरही हे विद्यार्थी उज्वल यश मिळवतील, असा विश्वास व्यक्त करण्यात आला आहे.
