पिंपरी-चिंचवड : लीना बोराडे प्रतिनिधी
पिंपरी-चिंचवड महानगरपालिकेच्या प्रशासन, आगामी विकास आराखडे, नागरिकांच्या मूलभूत सुविधा तसेच महिला सुरक्षेच्या प्रश्नांवर आमदार महेशदादा लांडगे यांनी सविस्तर भूमिका मांडली. एस पी नाईन मराठी माध्यम समूहाशी झालेल्या या खास बातचीतीत शहराच्या सर्वांगीण विकासासाठी पारदर्शक प्रशासन, गतिमान निर्णयप्रक्रिया आणि लोकसहभाग या मुद्द्यांवर भर देण्यात आला.यावेळी एस पी नाईन मराठी माध्यम समूहाचे मॅनेजिंग डायरेक्टर सागर पाटील, महाराष्ट्राचे पीआरओ रोहित डवरी तसेच पिंपरी-चिंचवड एस पी नाईन निर्भया वुमन असोसिएशनच्या अध्यक्ष लीना बोराडे हे उपस्थित होते.
आमदार महेशदादा लांडगे यांनी बोलताना सांगितले की, पिंपरी-चिंचवड शहराचा वेगाने होत असलेला विकास लक्षात घेता पायाभूत सुविधा, रस्ते, पाणीपुरवठा, स्वच्छता, आरोग्य आणि शिक्षण या क्षेत्रांत दर्जेदार काम होणे आवश्यक आहे. महानगरपालिकेच्या माध्यमातून नागरिककेंद्री योजना प्रभावीपणे राबविण्याचा प्रशासनाचा प्रयत्न असून, जनतेच्या सूचना आणि तक्रारींना प्राधान्य दिले जाईल, असेही त्यांनी स्पष्ट केले.महिला सुरक्षेबाबत बोलताना त्यांनी निर्भया वुमन असोसिएशनच्या कार्याचे कौतुक केले. महिलांच्या सुरक्षेसाठी आणि सक्षमीकरणासाठी प्रशासन, पोलीस यंत्रणा आणि सामाजिक संस्थांमध्ये समन्वय अत्यंत गरजेचा असल्याचे त्यांनी नमूद केले.
यावेळी सागर पाटील यांनी माध्यमांची सामाजिक जबाबदारी अधोरेखित करताना, जनतेपर्यंत सत्य आणि सकारात्मक माहिती पोहोचविण्यासाठी एस पी नाईन मराठी माध्यम समूह सातत्याने कार्यरत असल्याचे सांगितले. रोहित डवरी यांनी शासन-प्रशासन आणि माध्यमांमधील समन्वय अधिक मजबूत होण्याची आवश्यकता व्यक्त केली. तर लीना बोराडे यांनी महिलांसाठी राबविण्यात येणाऱ्या विविध उपक्रमांची माहिती देत, पुढील काळात अधिक व्यापक पातळीवर काम करण्याचा निर्धार व्यक्त केला.ही खास बातचीत पिंपरी-चिंचवड शहराच्या भविष्यातील दिशा ठरविण्यास महत्त्वपूर्ण ठरणार असून, नागरिकांच्या अपेक्षा आणि प्रशासनाच्या भूमिका यांचा समतोल साधणारी असल्याचे मत उपस्थितांनी व्यक्त केले.
