प्रतिनिधी जानवी घोगळे
मुंबई, दि. 31 जुलै 2025 : राज्य सरकारच्या सांस्कृतिक कार्य विभागाच्या वतीने राबवण्यात येणाऱ्या *राजर्षी शाहू महाराज ज्येष्ठ साहित्यिक व कलावंत मानधन सन्मान योजनेच्या अर्ज भरण्याची अंतिम तारीख आता *१५ दिवसांनी वाढविण्यात आली आहे. ही घोषणा सांस्कृतिक कार्यमंत्री ॲड. आशिष शेलार यांनी आज अधिकृतरित्या केली.
या योजनेअंतर्गत राज्यातील ज्येष्ठ साहित्यिक व कलावंतांना आर्थिक सन्मान देऊन त्यांच्या कार्याची पावती दिली जाते. पूर्वी या योजनेसाठी अर्ज करण्याची अंतिम मुदत ३१ जुलै २०२५ होती. मात्र, राज्यभरातील अनेक ज्येष्ठ कलाकार, साहित्यिक व त्यांच्या संघटनांकडून अर्ज प्रक्रियेची मुदत वाढविण्याची मागणी करण्यात आली होती.
या मागणीकडे सकारात्मक प्रतिसाद देत, सांस्कृतिक कार्यमंत्री ॲड. शेलार यांनी संबंधित यंत्रणांना १५ दिवसांची मुदतवाढ देण्याचे निर्देश दिले असून, आता इच्छुक लाभार्थी १५ ऑगस्ट २०२५ पर्यंत आपले अर्ज सादर करू शकतील. यासंदर्भात सांस्कृतिक कार्य संचालनालयाने संबंधित कार्यवाही तातडीने सुरू करण्याचे आदेशही देण्यात आले आहेत.
योजना का महत्वाची?
राजर्षी शाहू महाराज ज्येष्ठ साहित्यिक व कलावंत मानधन सन्मान योजना ही राज्य सरकारची महत्त्वाकांक्षी योजना असून, राज्यातील विविध कलाक्षेत्रात कार्यरत ज्येष्ठ कलावंत व साहित्यिकांचा गौरव करण्यासाठी ही योजना राबवली जाते. त्यांच्या प्रदीर्घ योगदानाची दखल घेत दरवर्षी निवड प्रक्रियेनंतर निवड झालेल्या पात्र व्यक्तींना मानधन व सन्मान प्रमाणपत्र प्रदान केले जाते.
अर्ज कसा करावा?
राज्य शासनाच्या सांस्कृतिक कार्य विभागाच्या अधिकृत संकेतस्थळावरून अर्जाचा नमुना प्राप्त करता येईल. इच्छुकांनी सर्व आवश्यक कागदपत्रांसह अर्ज नियोजित मुदतीपूर्वी संचालक, सांस्कृतिक कार्य संचालनालय, मुंबई या कार्यालयाकडे सादर करावा.
अधिक माहितीसाठी किंवा अर्ज प्रक्रियेविषयी मार्गदर्शनासाठी संबंधित जिल्हा सांस्कृतिक अधिकारी किंवा संचालनालयाशी संपर्क साधावा.
