प्रतिनिधी प्रा. मेघा पाटील
“जुने दिवस, जुने मित्र आणि नात्यांची नव्याने उजळण
कोल्हापूर, दि. ९ ऑगस्ट २०२५: छत्रपती शाहू इन्स्टिट्यूट ऑफ बिझनेस एज्युकेशन अँड रिसर्च (CSIBER) महाविद्यालयाच्या स्कूल ऑफ कॉम्प्युटर सायन्स विभागात शनिवारी भावनांचा वर्षाव झाला. एमसीए (मास्टर्स ऑफ कॉम्प्युटर अॅप्लिकेशन्स) २००० बॅचचे विद्यार्थी तब्बल २५ वर्षांनी पुन्हा एकत्र आले. विशेष म्हणजे हा सोहळा सायबरच्या सुवर्ण महोत्सवी वर्षात पार पडला — गुणवत्तापूर्ण शिक्षणाच्या ५० वर्षांच्या यशस्वी प्रवासात हा क्षण अनोखा ठरला.कार्यक्रमाची सुरुवात सौ. स्नेह नागांवकर यांच्या उत्कट सूत्रसंचालनाने झाली. विभागप्रमुख डॉ. एस. डी. भोईटे यांनी स्वागतपर भाषणातून माजी विद्यार्थ्यांचे मनःपूर्वक स्वागत करत त्यांच्या व्यावसायिक यशाचा गौरव केला.माजी विद्यार्थी प्रतिनिधी म्हणून श्री. विकस शर्मा यांचा सत्कार करण्यात आला. विविध क्षेत्रांमध्ये योगदान देणाऱ्या सर्व माजी विद्यार्थ्यांना सन्मानचिन्ह प्रदान करण्यात आले.
c
टाळ्यांच्या गजरात वातावरण आनंदाने भारावून गेले.प्रभार संचालिका डॉ. बिंदू मेनन यांनी सायबरच्या स्थापनेपासून आजवरच्या शैक्षणिक प्रगतीचा आणि नवकल्पनांचा आढावा घेतला. *“गुणवत्तापूर्ण शिक्षण आणि सातत्यपूर्ण नवोपक्रम हेच आमचे ध्येयधोरण आहे”*, असे त्या म्हणाल्या.माजी विद्यार्थ्यांनी जुन्या आठवणींना उजाळा दिला, शिक्षकांविषयी कृतज्ञता व्यक्त केली आणि सायबरच्या शिक्षणाने दिलेल्या आयुष्यदिशेची जाणीव करून दिली. संस्था–माजी विद्यार्थी नाते दृढ करण्यासाठी स्मृतिचिन्हे व पुष्पगुच्छ प्रदान करण्यात आले.डॉ. आर. एस. कामत यांनी माजी विद्यार्थ्यांना संस्थेशी सतत जोडलेले राहण्याचे आणि सध्याच्या विद्यार्थ्यांना मार्गदर्शन करण्याचे आवाहन केले. कार्यक्रमात जुने सहाध्यायी, प्राध्यापक व सध्याचे विद्यार्थी आनंदी गप्पा, अनुभवांची देवाणघेवाण आणि हशांनी भारावून गेले.कार्यक्रमाची सांगता डॉ.श्रुती जामसांडेकर यांच्या आभारप्रदर्शनाने झाली. सुवर्ण महोत्सवी वर्षातील हा पुनर्मिलन सोहळा केवळ जुन्या मैत्रीचे धागे पुन्हा विणणारा ठरला नाही, तर सायबरच्या *‘चिरस्थायी नातेसंबंध व आजीवन शिक्षण’* या ब्रीदवाक्यालाही प्रत्यक्ष अर्थ देणारा ठरला.
