प्रतिनिधी जानवी घोगळे
आज देशाच्या राजकारणातील एक ऐतिहासिक क्षणाचे साक्षीदार संपूर्ण राष्ट्र झाले. राष्ट्रपती द्रौपदी मुर्मू यांच्या हस्ते सी. पी. राधाकृष्णन यांनी भारताचे १५ वे उपराष्ट्रपती म्हणून शपथ घेतली. हा सोहळा राष्ट्रपती भवनातील गणतंत्र मंडपम येथे मोठ्या थाटामाटात पार पडला.
शपथविधी सोहळ्याला देशातील सर्वोच्च नेते, मान्यवर आणि उच्चपदस्थ अधिकारी मोठ्या संख्येने उपस्थित होते. यामध्ये सर्वोच्च न्यायालयाचे मुख्य न्यायमूर्ती भूषण गवई, पंतप्रधान नरेंद्र मोदी, लोकसभा अध्यक्ष ओम बिर्ला, माजी राष्ट्रपती रामनाथ कोविंद, माजी उपराष्ट्रपती जगदीप धनखड, तसेच अनेक केंद्रीय मंत्री उपस्थित होते.
महाराष्ट्रातून या सोहळ्यास मुख्यमंत्री देवेंद्र फडणवीस, उपमुख्यमंत्री एकनाथ शिंदे, महाराष्ट्र विधानसभेचे अध्यक्ष ॲड. राहुल नार्वेकर आणि महाराष्ट्र विधानपरिषद सभापती प्रा. राम शिंदे यांनी उपस्थित राहून नव्या उपराष्ट्रपतींना शुभेच्छा दिल्या. याशिवाय विविध राज्यांचे मुख्यमंत्री, राजकीय नेते, मान्यवर व दिग्गज अधिकारी या ऐतिहासिक क्षणाचे साक्षीदार झाले.
सी. पी. राधाकृष्णन यांचा राजकीय आणि सामाजिक क्षेत्रातील दीर्घ अनुभव, अभ्यासपूर्ण दृष्टीकोन आणि ठाम नेतृत्वगुण यामुळे ते उपराष्ट्रपती पदावर कार्यरत होताना देशाच्या लोकशाही परंपरेला अधिक बळकट करतील, अशी अपेक्षा व्यक्त केली जात आहे.
या शपथविधी सोहळ्याने देशाच्या राजकीय इतिहासात एक नवा अध्याय सुरू केला आहे.
