पुणे : आदरणीय डॉ. ज्ञानेश्वर मुळे साहेब यांच्या पुढाकाराने आणि मार्गदर्शनानुसार डॉ. ज्ञानेश्वर मुळे फाऊंडेशन, पुणे तसेच लेदर सेक्टर स्किल कौन्सिल (भारत सरकार) यांच्या संयुक्त विद्यमाने लेदर सेक्टर उद्योजकता आधारित कौशल्य विकास प्रशिक्षण उपक्रमाचा शुभारंभ आज पुण्यात झाला.
या महत्त्वपूर्ण उपक्रमांतर्गत अ.जाती समूहातील चर्मकार, होलार, मोची, ढोर समुदायातील युवक-युवतींना “हॅण्ड्स ऑन लेदर गारमेंट निर्मिती प्रात्यक्षिक प्रशिक्षण” दिले जाणार आहे. आधुनिक तंत्रज्ञानाच्या संगतीत हे प्रशिक्षण युवकांना स्वयंरोजगार, स्टार्टअप आणि उद्योजकतेच्या नव्या वाटा खुल्या करून देणार आहे.
उद्घाटन प्रसंगी प्रमुख मार्गदर्शक म्हणून उपस्थित असलेल्या मा. संजय मुळे सरांनी दीपप्रज्वलन करून कार्यक्रमाचे उद्घाटन केले आणि अध्यक्षीय भाषणात या उपक्रमाचे मनःपूर्वक कौतुक केले. त्यांनी सांगितले की,
“चर्मकार समाजाकडे असलेले नैसर्गिक कौशल्य अत्यंत मौल्यवान आहे. या प्रशिक्षणाद्वारे त्यांना आधुनिक फॅशन इंडस्ट्रीशी जोडून आर्थिक सक्षमीकरणाचा मजबूत पाया घालण्यात येत आहे.”
कार्यक्रमात लेदर सेक्टर स्किल कौन्सिलच्या अधिकाऱ्यांनी प्रशिक्षणाची रचना, रोजगाराच्या संधी, बाजारपेठेतील मागणी याविषयी सविस्तर माहिती दिली. प्रशिक्षकांनी प्रत्यक्ष लेदर गारमेंट निर्मितीचे डेमो देत तरुण सहभागींमध्ये उत्साह निर्माण केला.
उपस्थित युवक-युवतींनी मोठ्या संख्येने नोंदणी करून या उपक्रमाला उत्स्फूर्त प्रतिसाद दिला असून प्रशिक्षणानंतर उद्योजकता मार्गदर्शन, प्रॉडक्ट डेव्हलपमेंट आणि मार्केट लिंकिंग याची सुविधाही उपलब्ध करून दिली जाणार आहे.
डॉ. ज्ञानेश्वर मुळे फाऊंडेशनच्या या उपक्रमामुळे वंचित घटकातील अनेक तरुणांसाठी स्वावलंबन, कौशल्य आणि प्रगतीची नवी वाट निर्माण झाल्याचे मान्यवरांनी व्यक्त केले.
