कोल्हापूर प्रतिनिधी : पांडुरंग फिरींगे
राज्यातील राजकारणात तसेच सहकार क्षेत्रात मोठी पोकळी निर्माण करणाऱ्या उपमुख्यमंत्री अजित पवार यांच्या अपघाती निधनाची बातमी समजताच गोकुळ दूध संघाचे संचालक डॉ. चेतन अरुण नरके व त्यांच्या कुटुंबीयांना जबर धक्का बसला आहे. दीर्घकाळापासून असलेले अत्यंत जिव्हाळ्याचे, घरगुती संबंध एका क्षणात हरपल्याची भावना नरके कुटुंबीयांच्या चेहऱ्यावर स्पष्टपणे दिसून येत होती.लोकसभेच्या निवडणुकीदरम्यान राष्ट्रवादी काँग्रेस पक्षाकडून डॉ. चेतन नरके यांना उमेदवारी देण्याबाबत उपमुख्यमंत्री अजित पवार यांनी स्वतः पुढाकार घेत नरके यांच्या निवासस्थानी भेट दिली होती. ही भेट केवळ राजकीय औपचारिकतेपुरती मर्यादित नव्हती, तर आपुलकी, विश्वास आणि स्नेहातून घडलेली होती. त्या भेटीत झालेला संवाद, दिलेला शब्द आणि दाखवलेला आत्मीयपणा आज आठवणींच्या रूपाने डोळ्यांसमोर उभा राहतो आहे.
डॉ. चेतन नरके यांचीही उपमुख्यमंत्री अजित पवार यांच्या निवासस्थानी नेहमी ये-जा होती. दोन्ही कुटुंबांमध्ये औपचारिकतेपलीकडे जाऊन घरगुती, आपुलकीचे संबंध निर्माण झाले होते. सण-समारंभ, कौटुंबिक प्रसंग तसेच राजकीय व सामाजिक विषयांवर होणाऱ्या चर्चा या नात्यांना अधिक घट्ट करणाऱ्या ठरत होत्या. अजित पवार यांचे स्पष्ट वक्तृत्व, निर्णयक्षमता आणि सामान्य कार्यकर्त्यांपर्यंत पोहोचण्याची शैली डॉ. नरके यांना नेहमीच प्रेरणादायी वाटत होती.
मात्र उपमुख्यमंत्री अजित पवार यांच्या अपघाती निधनाची बातमी समजताच नरके कुटुंबीय अक्षरशः स्तब्ध झाले. क्षणभर विश्वास न बसणारी ही घटना खरी असल्याचे समजताच घरात शोककळा पसरली. “अजितदादा आमच्या कुटुंबातीलच एक सदस्य होते,” अशा भावना व्यक्त करताना डॉ. चेतन नरके यांचे डोळे पाणावले होते. त्यांच्या कुटुंबीयांनाही या दुःखद घटनेने मोठा मानसिक आघात बसला आहे.राजकीय जीवनात कठोर निर्णय घेणारे, मात्र वैयक्तिक आयुष्यात अत्यंत मृदू, आपुलकीने वागणारे नेतृत्व म्हणून अजित पवार यांची ओळख होती. हीच ओळख डॉ. नरके व त्यांच्या कुटुंबीयांच्या मनात कायमची कोरली गेली आहे. त्यांच्या जाण्याने केवळ एक मोठा नेता नाही, तर एक जिव्हाळ्याचा स्नेही, मार्गदर्शक आणि आपला माणूस हरपल्याची भावना नरके कुटुंब व्यक्त करत आहे.उपमुख्यमंत्री अजित पवार यांच्या अपघाती निधनाने राज्यासह कोल्हापूर जिल्ह्यात शोककळा पसरली असून, डॉ. चेतन नरके कुटुंबीयांनी या दुःखद प्रसंगी पवार कुटुंबीयांप्रती शोकसंवेदना व्यक्त केल्या आहेत. त्यांच्या आठवणी, विचार आणि आपुलकीची नाती कायम स्मरणात राहतील, अशी भावनिक प्रतिक्रिया नरके कुटुंबीयांकडून व्यक्त करण्यात आली आहे.
