प्रतिनिधी पांडुरंग फिरींगे -कोल्हापूर प्रादेशिक परिवहन कार्यालयातील वाहन पासिंग प्रक्रियेत होत असलेल्या त्रुटी, वाढीव शुल्क व खाजगीकरणाच्या हालचालीविरोधात वाहनधारकांनी तीव्र नाराजी व्यक्त केली आहे. पासिंगसाठी वापरला जाणारा ट्रॅक पूर्णपणे दुरावस्थेत असून त्यावरून जाणाऱ्या वाहनांना अनावश्यक कारणांवर फेल रिमार्क दिले जात असल्याची तक्रार करण्यात आली. मात्र एजंटमार्फत येणाऱ्या वाहनांना सहज पासिंग मिळत असल्याचा आरोपही करण्यात आला आहे.गेल्या दोन वर्षांत फिटनेस शुल्क रु. ३५०० वरून थेट रु. १३,५०० पर्यंत वाढवण्यात आले. तसेच १५ नोव्हेंबर २०२५ पासून वार्षिक पासिंग फी तब्बल रु. २८,००० करण्यात आली असून ही वाढ फक्त महाराष्ट्रातच लागू असल्याचा दावा वाहनधारकांनी केला आहे.आरटीओ आवारात नव्याने उभारण्यात आलेल्या मंडपात बीओटी तत्वावर पासिंग करण्याची तयारी सुरू असून यामुळे आणखी आर्थिक बोजा वाहनधारकांवर पडणार असल्याची भीती व्यक्त झाली आहे.या अन्यायकारक वसुलीला आळा घालण्यासाठी सर्व संघटनांनी एकत्र येऊन आवाज उठवावा, अशी मागणी शिवसेना महाराष्ट्र वाहतूक सेनेचे पदाधिकारी रविकिरण इंगवले, दिनेश परमार, अस्लम सय्यद, संदीप पाटील, दत्ता फराकटे, अरुण पाटील यांनी केली आहे.या संदर्भातील निवेदन परिवहन मंत्री प्रताप सरनाईक, पालकमंत्री प्रकाश आबिटकर, जिल्हाधिकारी अमोल येडगे आणि राज्याध्यक्ष उदय दळवी यांना सादर करण्यात आले आहे.
