राधानगरी | प्रतिनिधी
राधानगरी तालुक्यातील कसबा तारळे जिल्हा परिषद मतदारसंघातून भारतीय जनता पार्टीकडून सौ. स्नेहल शेखर भैय्यासाहेब पाटील उद्या आपला उमेदवारी अर्ज अधिकृतपणे दाखल करणार आहेत. या अर्ज दाखल कार्यक्रमामुळे राधानगरी तालुक्यातील राजकीय वातावरण चांगलेच तापले असून भाजप कार्यकर्त्यांमध्ये उत्साहाचे वातावरण आहे.
या उमेदवारीसाठी खासदार धनंजय महाडिक युवाशक्तीचे राधानगरी तालुका अध्यक्ष शेखर भैय्यासाहेब पाटील यांनी ही माहिती दिली. त्यांनी सांगितले की, सौ. स्नेहल पाटील या सामाजिक कार्यात सक्रिय असून, महिला सक्षमीकरण, ग्रामविकास, शिक्षण, आरोग्य आणि मूलभूत सुविधांच्या प्रश्नांवर त्यांचे ठोस काम आहे. त्यामुळे कसबा तारळे मतदारसंघातील जनतेत त्यांना मोठा पाठिंबा मिळत आहे.
उमेदवारी अर्ज दाखल करताना भाजपचे वरिष्ठ पदाधिकारी, स्थानिक नेते, कार्यकर्ते तसेच महिला पदाधिकारी मोठ्या संख्येने उपस्थित राहणार आहेत. या वेळी शक्तिप्रदर्शनासह रॅली काढून अर्ज दाखल केला जाण्याची शक्यता असून, भाजपकडून संघटनात्मक ताकद दाखवली जाणार आहे.
शेखर भैय्यासाहेब पाटील यांनी पुढे सांगितले की, “कसबा तारळे मतदारसंघाचा सर्वांगीण विकास, रस्ते, पाणीपुरवठा, आरोग्य सेवा, शिक्षण सुविधा आणि शेतकऱ्यांच्या प्रश्नांना प्राधान्य देणे हे सौ. स्नेहल पाटील यांचे मुख्य उद्दिष्ट आहे. भाजपचे विकासात्मक धोरण आणि केंद्र व राज्य सरकारच्या योजनांचा लाभ तळागाळातील नागरिकांपर्यंत पोहोचवण्यासाठी त्या कटिबद्ध आहेत.”
या उमेदवारीमुळे कसबा तारळे जिल्हा परिषद मतदारसंघातील निवडणूक अधिक चुरशीची होणार असून, येत्या काळात प्रचाराला वेग येण्याची चिन्हे दिसत आहेत.
