प्रतिनिधी : जानवी घोगळे
आळवे गावच्या सहकार चळवळीला दिशा देणारे, शेतकरी हितासाठी आयुष्य झिजवणारे आणि आपल्या कर्तृत्वाने गावाच्या प्रत्येक घरात स्थान निर्माण करणारे स्वर्गीय श्री. शरद दत्तात्रय गायकवाड (तात्या) यांच्या प्रथम पुण्यस्मरणानिमित्त शनिवार दि. १४ फेब्रुवारी २०२६ रोजी अत्यंत भावपूर्ण वातावरणात कार्यक्रम संपन्न झाला.तात्या आपल्यातून जाऊन आज एक वर्ष पूर्ण झाले असले, तरी त्यांच्या कार्याच्या, प्रेमळ स्वभावाच्या आणि जिद्दी नेतृत्वाच्या आठवणी आजही ताज्याच आहेत. “माणूस जिवंत असताना नव्हे, तर त्याच्या कार्यातून कायम स्मरणात राहतो” याचा प्रत्यय या पुण्यस्मरण सोहळ्यात आला.
रोपट्यापासून वटवृक्षापर्यंतचा प्रवासतात्यांनी मोठ्या धडाडीने आणि दूरदृष्टीने स्थापन केलेली संजीवनी देवी सहकारी दूध संस्था आळवे* ही संस्था आज गावाच्या आर्थिक विकासाचा कणा बनली आहे. सुरुवातीच्या अडचणी, मर्यादित साधनसामग्री आणि स्पर्धात्मक वातावरण यांना तोंड देत त्यांनी लावलेले रोपटे आज भक्कम वटवृक्षात रूपांतरित झाले आहे.शेकडो शेतकरी सभासदांच्या विश्वासावर उभी असलेली ही संस्था केवळ दूध संकलनापुरती मर्यादित न राहता गावाच्या प्रगतीचे प्रतीक बनली आहे. तात्यांची पारदर्शकता, प्रामाणिकपणा आणि सहकाराची भूमिका यामुळेच ही संस्था यशस्वी झाली, असे मत अनेक सभासदांनी व्यक्त केले.
सामाजिक बांधिलकीचा प्रेरणादायी उपक्रमप्रथम पुण्यस्मरणानिमित्त कुटुंबीयांनी आणि संस्थेच्या पदाधिकाऱ्यांनी अनाठायी खर्चाला फाटा देत एक वेगळा आदर्श निर्माण केला. सर्वसामान्य सभासद आणि दूधसंस्थेचे प्रतीक म्हणून “दुधाची किटली” ही भेटवस्तू प्रत्येक सभासदाला देण्यात आली.ही भेटवस्तू केवळ एक वस्तू नसून तात्यांच्या कार्याची, सहकार भावनेची आणि शेतकऱ्यांप्रती असलेल्या नात्याची आठवण म्हणून देण्यात आली. या उपक्रमामुळे उपस्थितांमध्ये विशेष समाधान आणि अभिमानाची भावना निर्माण झाली.
सेवाभावी व्यक्तींचा सन्मानया कार्यक्रमात संस्थेसाठी तब्बल ३० वर्षे अखंड सेवा बजावणारे सचिव श्री. सरदार महीपती लाड यांचा विशेष सत्कार करण्यात आला. त्यांच्या सातत्यपूर्ण आणि निष्ठावंत सेवेबद्दल कृतज्ञता व्यक्त करण्यात आली.तसेच शेतकरी बांधवांच्या शेतावर व गोठ्यावर रात्री-अपरात्री धाव घेणारे, पशुवैद्यकीय सेवा देणारे डॉ. पांडुरंग मगदूम साहेब यांचाही सन्मान करण्यात आला. शेतकऱ्यांच्या संकटसमयी मदतीला धावून जाणाऱ्या या सेवाभावी वृत्तीबद्दल उपस्थितांनी त्यांचे कौतुक केले.
ऋणानुबंधांचा सन्मानज्यांच्या नावाने आणि आशीर्वादाने ही संस्था उभी राहिली त्या संजीवनीदेवी संजयसिंह गायकवाड यांच्या चिरंजीव श्री. करणसिंह गायकवाड तसेच श्री. आण्णासाहेब गायकवाड यांचा सत्कार करण्यात आला. या प्रसंगी तात्यांच्या सहवासातील अनेक आठवणींना उजाळा देताना कुटुंबीय आणि उपस्थित भावूक झाले. भावपूर्ण उपस्थितीया पुण्यस्मरण कार्यक्रमास संपूर्ण गायकवाड परिवार, संस्थेचे पदाधिकारी, सभासद, तात्या प्रेमी, मित्रपरिवार आणि गावकरी मोठ्या संख्येने उपस्थित होते. सर्वांनी तात्यांच्या प्रतिमेस पुष्पांजली अर्पण करून त्यांच्या कार्याला वंदन केले.तात्यांचे आयुष्य हे सहकार, सेवा आणि समाजाभिमुख विचारांचे जिवंत उदाहरण होते. त्यांनी उभा केलेला वारसा आजही गावाच्या प्रगतीतून दिसून येतो. त्यांच्या प्रथम पुण्यस्मरणानिमित्त घेतलेला हा सामाजिक उपक्रम निश्चितच पुढील पिढ्यांसाठी प्रेरणादायी ठरणार आहे.“तात्या शरीराने दूर गेले असले तरी त्यांच्या कार्यरूपाने ते आजही प्रत्येकाच्या मनात जिवंत आहेत.”
