प्रतिनिधी : जानवी घोगळे
फक्राबाद येथे अन्न व औषध प्रशासन विभागाने मोठी कारवाई करत पॅराफिनसारख्या घातक रासायनिक पदार्थांचा वापर करून बनावट दूध तयार करणाऱ्या रॅकेटचा पर्दाफाश केला. या कारवाईत हजारो लिटर बनावट दूध जप्त करण्यात आले असून तिघा संशयितांना ताब्यात घेण्यात आले आहे.
मिळालेल्या माहितीनुसार, संबंधित आरोपी कमी दर्जाच्या द्रवांमध्ये पॅराफिन केमिकल, डिटर्जंट व इतर रसायने मिसळून कृत्रिम दूध तयार करत होते. हे दूध स्थानिक बाजारपेठेत तसेच काही हॉटेल आणि डेअरींमध्ये पुरवठा केल्याची प्राथमिक माहिती समोर आली आहे.
छाप्यात मोठ्या प्रमाणावर रासायनिक साठा, तयार बनावट दूध आणि पॅकिंग साहित्य जप्त करण्यात आले. अन्न व औषध प्रशासनाच्या अधिकाऱ्यांनी नमुने तपासणीसाठी प्रयोगशाळेकडे पाठवले असून संबंधितांवर भेसळ प्रतिबंधक कायद्यांतर्गत गुन्हा दाखल करण्यात आला आहे.
तज्ज्ञांच्या मते, पॅराफिनसारख्या रसायनांचे सेवन केल्यास पोटदुखी, उलट्या, जुलाब तसेच दीर्घकालीन आरोग्याच्या तक्रारी उद्भवू शकतात. त्यामुळे नागरिकांनी दूध खरेदी करताना अधिकृत डेअरी किंवा विश्वासार्ह विक्रेत्यांकडूनच खरेदी करावी, असे आवाहन प्रशासनाकडून करण्यात आले आहे.
या घटनेमुळे परिसरात खळबळ उडाली असून अन्नसुरक्षेबाबत नागरिकांमध्ये चिंता व्यक्त केली जात आहे. पुढील तपास सुरू आहे.
