प्रतिनिधी : अभिनंदन पुरीबुवा कोल्हापूर : कोल्हापूर जिल्ह्यातील महायुतीच्या उमेदवारांच्या प्रचारार्थ आज १७ नोव्हेंबर रोजी उत्तर प्रदेश चे मुख्यमंत्री योगी आदित्यनाथ कोल्हापूर दौऱ्यावर येत आहेत. कोल्हापुरातील तपोवन मैदानात त्यांच्या सभेच आयोजन करण्यात आले आहे.सकाळी साडे दहा वाजता जाहीर सभा होणार आहे, अशी माहिती भारतीय जनता पक्षातर्फे देण्यात आली.
योगी आदित्यनाथ आज कोल्हापूर येथील विमानतळावर दाखल होतील. त्यानंतर ते सभास्थळी येतील. त्यामुळे आज विमानतळ ते तपोवन मैदान येथील वाहतूक मार्गात बदल करण्यात आला आहे. सभेला कोल्हापूर उत्तर मतदारसंघाचे उमेदवार राजेश क्षीरसागर, दक्षिण मतदारसंघाचे उमेदवार अमल महाडिक, करवीर मतदारसंघाचे उमेदवार चंद्रदीप नरके, राधानगरी-भुदरगड विधानसभा मतदारसंघाचे उमेदवार प्रकाश आबिटकर यांच्यासह खासदार धनंजय महाडिक, गोकुळच्‍या संचालिका शौमिका महाडिक, माजी खासदार संजय मंडलिक यांच्यासह भाजप-शिवसेनेचे पदाधिकारी उपस्थित राहणार आहेत.
विधानसभा निवडणुकीचा प्रचार अंतिम टप्प्यात आहे. महायुतीचा राज्यातील प्रचाराचा प्रारंभ कोल्हापुरातून झाला होता. योगी आदित्यनाथ यांच्या सभेची महायुतीचे नेते, कार्यकर्ते यांना उत्सुकता लागली आहे. सभेच्या तयारीची बैठक नुकतीच पक्षाच्या कार्यालयात झाली.
