प्रतिनिधी मेघा पाटील
‘
महिलांनी पुढाकार घेत आपल्या तक्रारी मांडाव्यात
रुपाली चाकणकर यांचे आवाहन
कोल्हापूर, दि. 17 (जिमाका): राज्य महिला आयोगाकडून ‘महिला आयोग आपल्या दारी या उपक्रमांतर्गत कोल्हापूर जिल्ह्यातील तक्रारींची जनसुनावणी शुक्रवार दिनांक 20 डिसेंबर 2024 रोजी जिल्हाधिकारी कार्यालय आवार, कोल्हापूर येथे सकाळी 11 वाजता होणार असून राज्य महिला आयोगाच्या अध्यक्षा रुपाली चाकणकर आणि सदस्य सचिव माया पाटोळे तक्रारींची सुनावणी घेणार आहेत. जिल्ह्यात होणा-या या जनसुनावणीत महिलांनी पुढे येऊन न घाबरता आपल्या तक्रारी मांडाव्यात, असे आवाहन आयोगाच्या अध्यक्षा रुपाली चाकणकर यांनी केले आहे.
राज्य महिला आयोगाच्या अध्यक्षा रुपाली चाकणकर दिनांक 20 डिसेंबर रोजी जिल्हा दौऱ्यावर असणार आहेत. महिलांना त्यांच्या जिल्ह्याच्या ठिकाणी न्याय मिळावा यासाठी आयोगाकडून 'महिला आयोग आपल्या दारी' हा उपक्रम राबविण्यात येत आहे. यामध्ये जिल्हा स्तरावर जनसुनावणी घेत महिलांच्या तक्रारींचे निवारण करण्याचा प्रयत्न आहे. जनसुनावणीनंतर महिला व बालकांच्या प्रश्नांच्या अनुषंगाने जिल्ह्याची आढावा बैठक घेण्यात येणार आहे.‘महाराष्ट्र राज्य महिला आयोग महिलांच्या सक्षमीकरणासाठी अविरत कार्यरत आहे. राज्याच्या कानाकोपऱ्यातील महिलांना मुंबई कार्यालयात येऊन तक्रार करणे, सुनावणीसाठी प्रत्यक्ष उपस्थित राहणे, आर्थिकदृष्ट्या तसेच इतर कारणांमुळे शक्य होत नाही. त्यामुळे आयोग जिल्हास्तरावर सर्व यंत्रणेनिशी जात आहे. महिला आयोग आपल्या दारी अंतर्गत जनसुनावणीला पोलीस, प्रशासन, विधी सल्लागार, संरक्षण अधिकारी, समुपदेशक, जिल्हा समन्वयक आदी उपस्थित असल्याने तक्रारीवर त्याच ठिकाणी कार्यवाही करण्यात येते. यातून आपली कैफियत मांडणा-या महिलांना त्वरित दिलासा देण्याच काम आयोग करत असून ‘महिला आयोग आपल्या दारी’ या उपक्रमात महिलांनी उपस्थित राहून न घाबरता आपल्या तक्रारी मांडाव्यात, असे आवाहन आयोगाच्या अध्यक्षा चाकणकर यांनी केले आहे.
