एस पी नाईन प्रतिनिधी प्रा मेघा पाटील
मुंबई, राजभवन – भारतीय प्रशासकीय सेवा (IAS) 2024 च्या तुकडीतील सात परिविक्षाधीन अधिकाऱ्यांनी आज महाराष्ट्राचे राज्यपाल आचार्य देवव्रत यांची राजभवन, मुंबई येथे सौजन्यपूर्वक भेट घेतली. प्रशासकीय क्षेत्रात प्रवेश करताना राज्यपालांशी झालेली ही भेट अधिकाऱ्यांसाठी प्रेरणादायी ठरली.या भेटीदरम्यान राज्यपालांनी नवोदित अधिकाऱ्यांशी संवाद साधत प्रामाणिकपणा, लोकाभिमुखता आणि पारदर्शकता या मूल्यांवर आधारित प्रशासनाची गरज स्पष्ट केली. देशहित आणि जनकल्याण हेच खरी प्रशासनाची दिशा असल्याचे सांगत त्यांनी प्रत्येक अधिकाऱ्याने आपल्या सेवेला “एक श्रेष्ठ राष्ट्रीय कर्तव्य” म्हणून पाहावे, असा संदेश दिला.
राज्यपालांनी पुढे बोलताना शाश्वत विकास, जलसंवर्धन, नैसर्गिक शेती, महिलांचे सक्षमीकरण, तंत्रज्ञानाधारित शासन अशा अनेक महत्त्वाच्या विषयांवर विचार मांडले. ग्रामीण व शहरी पातळीवरील प्रशासनिक आव्हानांना संवेदनशीलतेने सामोरे जाण्याचे आवाहनही त्यांनी नव्या अधिकाऱ्यांना केले.या प्रसंगी सामान्य प्रशासन विभागाचे सचिव पंकज कुमार, राज्यपालांचे सचिव डॉ. प्रशांत नारनवरे, सह सचिव सुभाष उमराणीकर, तसेच उपसचिव एस. राममूर्ती उपस्थित होते. अधिकाऱ्यांशी परिचय, प्रशिक्षण कालावधीतील अनुभव व भविष्यातील जबाबदाऱ्या याबाबतही सविस्तर चर्चा झाली.
नवोदित IAS अधिकाऱ्यांनी राज्यपालांच्या मार्गदर्शनाबद्दल कृतज्ञता व्यक्त करत सेवेत उत्कृष्टता, सत्यनिष्ठा आणि सार्वजनिक हितासाठी सातत्याने कार्य करण्याची बांधिलकी व्यक्त केली.राजभवनातील ही भेट नव्या प्रशासकांना प्रेरणा, दृष्टी आणि जबाबदारीची नवचेतना देणारी ठरली.
