प्रतिनिधी :जानवी घोगळे
मुंबई :
भारतीय संविधान दिनानिमित्त राजभवनात आज अत्यंत प्रतिष्ठेने आणि शिस्तबद्ध वातावरणात राज्य घटनेच्या प्रास्ताविकेचे सामूहिक वाचन करण्यात आले. देशाच्या लोकशाही मूल्यांप्रती आदर व्यक्त करण्यासाठी दरवर्षी २६ नोव्हेंबर हा दिवस संविधान दिन म्हणून साजरा केला जातो. त्यानिमित्त राजभवनात आयोजित कार्यक्रमात अधिकारी, कर्मचारी आणि मान्यवर मोठ्या संख्येने सहभागी झाले.
राज्यपालांचे सचिव डॉ. प्रशांत नारनवरे यांच्या नेतृत्वाखाली प्रास्ताविकेचे सामूहिक वाचन पार पडले. त्यांनी राज्यघटनेचे महत्त्व, तिच्या मुळ तत्वांचा गौरव आणि नागरीकांनी संविधानिक कर्तव्यांचे पालन करण्याची जबाबदारी यावर थोडक्यात भाष्य केले.
कार्यक्रमाला राज्यपालांचे उपसचिव एस. राममूर्ती, राज्यपालांचे परिवार प्रबंधक डॉ. निशिकांत देशपांडे, राज्यपालांचे परिसहायक *अभयसिंह देशमुख यांच्यासह राजभवनातील सर्व अधिकारी व कर्मचारी उपस्थित होते.
कार्यक्रमात उपस्थितांनी संविधानातील ‘न्याय, स्वातंत्र्य, समानता आणि बंधुता’ या मूल्यांचे जतन करण्याची प्रतिज्ञा व्यक्त केली. सामूहिक वाचनानंतर संविधान दिनाच्या औचित्याने राजभवन परिसरात विविध जागरूकता उपक्रम आणि संवाद सत्रांचे आयोजनही करण्यात आले.
राजभवनात संविधान दिनाचे आयोजन दरवर्षी उल्लेखनीय उत्साहाने पार पडत असून, यावर्षीही ते तितक्याच गांभीर्याने आणि आदराने साजरे करण्यात आले.
