कोल्हापूर, दि. —
कोल्हापुरातील शेंडा पार्क येथील राजर्षी छत्रपती शाहू महाराज वैद्यकीय नगरीमध्ये उभारण्यात आलेल्या राजर्षी छत्रपती शाहू महाराज शासकीय वैद्यकीय महाविद्यालयाच्या विविध वास्तूंचा उद्घाटन सोहळा वैद्यकीय शिक्षण मंत्री हसन मुश्रीफ आणि लोकप्रतिनिधी यांच्या हस्ते उत्साहात पार पडला.
या उद्घाटनप्रसंगी शासकीय वैद्यकीय महाविद्यालयात शिक्षण घेणाऱ्या विद्यार्थ्यांसाठी तसेच निवासी डॉक्टर व परिचारिकांसाठी आवश्यक असलेल्या अत्याधुनिक सुविधांनी युक्त वास्तूंचे लोकार्पण करण्यात आले. यामध्ये विद्यार्थ्यांचे हॉस्टेल, निवासी डॉक्टर व परिचारिकांसाठी स्वतंत्र हॉस्टेल, प्रशस्त ऑडिटोरियम, परीक्षा कक्ष व व्याख्यान कक्ष यांचा समावेश आहे. यामुळे वैद्यकीय शिक्षणाचा दर्जा अधिक उंचावण्यास मदत होणार आहे.
यासोबतच फॉरेन्सिक विभागासाठी स्वतंत्र इमारत तसेच अत्याधुनिक शवविच्छेदनगृहाची उभारणी करण्यात आली असून त्यामुळे न्यायवैद्यक सेवांना बळकटी मिळणार आहे. तसेच नव्याने प्रस्तावित ११०० खाटांचे (बेड्स) सुसज्ज हॉस्पिटल उभारणीचे काम प्रगतीपथावर असून भविष्यात कोल्हापूर आणि परिसरातील नागरिकांना उच्च दर्जाच्या आरोग्य सुविधा उपलब्ध होणार आहेत.
उपस्थितांशी संवाद साधताना वक्त्यांनी शेंडा पार्क हे भविष्यातील महत्त्वाचे प्रशासकीय केंद्र ठरणार असल्याचा विश्वास व्यक्त केला. आरोग्य सुविधांबरोबरच येथे सर्व प्रशासकीय सेवा, सर्किट बेंच, जिल्हा क्रीडा संकुल, आयटी पार्क यांची उभारणी करण्यात येत असून त्यामुळे शेंडा पार्कचा संपूर्ण चेहरामोहरा बदलणार आहे. विक्रमी वेळेत ही सर्व विकासकामे पूर्ण होत असल्याचा मनस्वी आनंद व्यक्त करण्यात आला.
या परिसराचा लोकप्रतिनिधी म्हणून या सर्व विकासकामांना सातत्याने सहाय्यभूत ठरलो, याचे समाधान आणि अभिमान असल्याची भावना यावेळी व्यक्त करण्यात आली.
या उद्घाटन सोहळ्यास जिल्हाधिकारी अमोल येडगे, कोल्हापूर महानगरपालिका आयुक्त तथा प्रशासक के. मंजूलक्ष्मी, राजर्षी छत्रपती शाहू महाराज शासकीय वैद्यकीय महाविद्यालयाचे अधिष्ठाता डॉ. सदानंद भिसे, वैद्यकीय अधीक्षक डॉ. भूषण मिरजे, डॉ. अजित लोकरे यांच्यासह महाविद्यालयातील सर्व प्राध्यापक, सार्वजनिक बांधकाम विभागाचे अधिकारी व कर्मचारी मोठ्या संख्येने उपस्थित होते.
या वास्तूंच्या उद्घाटनामुळे कोल्हापूर जिल्ह्यातील वैद्यकीय शिक्षण व आरोग्य सेवा क्षेत्राला नवी दिशा मिळणार असून शेंडा पार्क परिसर विकासाचा नवा केंद्रबिंदू ठरणार असल्याचे चित्र यावेळी स्पष्ट झाले.
