मुंबईतून एक धक्कादायक माहिती समोर आली आहे. गेल्या 34 दिवसांपासून बेपत्ता असलेल्या 19 वर्षीय तरुणीची मुंबईतील कळंबोली परिसरात हत्या झाल्याचे उघडकीस आले आहे. या तुरुणीची हत्या कोणी दुसऱ्याने नाही तर तिच्याच प्रियकराने केल्याचे उघड झाले आहे.
खारघरच्या डोंगरात आरोपीने तरुणीचा गळा आवळून खून केला. तर प्रेयसीची हत्याकरुन या प्रियकराने स्वतःला लोकल ट्रेनसमोर झोकून देत आत्महत्या केली. या प्रकरणात पोलिसांनी प्राथमिक तपासात तरुणीच्या हत्येचा उलगडा केला.
तरुणी 12 डिसेंबर रोजी झाली होती बेपत्ता
हत्या झालेली तरुणी गेल्या 12 डिसेंबर 2024 रोजी बेपत्ता झाली होती. या बाबत एका पोलीस अधिकाऱ्याने सांगितले की, आरोपी हा तरुणीने आपल्यासोबतचे संबंध तोडल्याच्या रागात होता. या रागातूनच त्याने तरुणीचा गळा दाबून खून केला. मिळालेल्या माहितीनुसार ही तरुणी 12 डिसेंबर रोजी सायन येथील तिच्या कॉलेजला निघाली होती. तेव्हापासून ती बेपत्ता झाली होती. या प्रकरणी कळंबोली पोलीस ठाण्यात हरवल्याची तक्रार दाखल करण्यात आली होती.
तुरुणाने केली आत्महत्या
कळंबोली येथील रहिवासी वैभव बुरुंगले याने आपल्या प्रेयसीची हत्या करुन 12 डिसेंबर 2023 रोजी जुईनगर रेल्वे स्थानकावर धावत्या लोकल ट्रेनसमोर उडी मारून आत्महत्या केली. या प्रकरणी गुन्हा दाखल होत चौकशीसाठी नवी मुंबई पोलीस आयुक्त मिलिंद भारंबे यांनी विशेष टास्क फोर्स स्थापन केले होते.
त्यानुसार, चौकशीदरम्यान पोलिसांना बुरुंगलेच्या मोबाईलमध्ये सेव्ह केलेली एक सुसाईड नोट सापडली आहे, ज्यामध्ये तरुणीची हत्या केली असून तो आत्महत्या करणार असल्याचे लिहिले होते. सुसाईड नोटमध्ये L01-501 सारखे कोड शब्द वापरण्यात आले होते, जे पोलिसांनी प्रकरण सोडवण्यासाठी डीकोड केले होते.
डंपिंग ग्राउंडमध्ये तरुणीचा मृतदेह
खारघरपासून सुमारे 6 किमी अंतरावर कळंबोली परिसरातील तरुणीची हत्या करण्यात आली होती. त्यानंतर डंपिंग ग्राउंडमध्ये तिचा मृतदेह झुडपात आढळून आला. महाविद्यालयाचा ड्रेस, घड्याळ आणि ओळखपत्राच्या आधारे मृतदेहाची ओळख पटली. त्यानुसार या प्रकरणी पुढील तपास सुरू असल्याचे पोलिसांनी सांगितले.
