प्रतिनिधी:अभिनंदन पुरीबुवा
कोल्हापूर: कोल्हापूर लोकसभा मतदारसंघात प्रचाराला वेग आला आहे. कांग्रेस चे विधानपरिषद आमदार सतेज पाटील यांनी महाविकास आघाडीचे उमेदवार शाहू महाराजांच्या प्रचाराची धुरा संभाळली आहे. छत्रपती संभाजीराजे देखील प्रचारात सक्रिय आहेत. महायुतीकडून देखील जोरदार प्रचार सुरू आहे. दरम्यान महायुतीचे उमेदवार संजय मंडलिक यांनी नाव न घेता शाहू महाराज, सतेज पाटील यांना टार्गेट केले आहे.’उमेदवाराने सातत्याने भूतकाळातल्या आपल्या पूर्वजांनी केलेल्या कामाचे श्रेय स्वतः घेऊन जनतेची दिशाभूल करू नये. याचे भान निवडणुकांचा प्रचंड अनुभव असणाऱ्या त्यांच्या प्रवक्त्यांनीही ठेवावे. आपण सांगू त्याच पद्धतीने प्रत्येकाने वागावे, अशा हुकूमशाही पद्धतीच्या थाटात प्रवक्ते वावरत आहेत’, असा टोलाही महायुतीचे उमेदवार संजय मंडलिक यांनी सतेज पाटील यांच्यासह शाहू महाराज यांचे नाव न घेता लगावला.लोकराजा राजर्षी छत्रपती शाहू महाराज यांचे सामाजिक एकोप्याचे विचार, त्यांनी केलेली विकासकामे आणि त्याचा आपल्याला लाभलेला वारसा, याबाबत बोलण्यापेक्षा राजर्षींच्या गादीचा मान राखून आपण कोल्हापूर लोकसभा मतदारसंघासाठी विकासाच्या दृष्टीने काय पावले उचलली, याचा लेखाजोखा आता लोकसभा निवडणुकीत उमेदवार म्हणून उभे राहिल्यानंतर मांडण्याची वेळ आली आहे. तेव्हा सातत्याने प्रवक्त्याआडून वारसा न सांगता समोर या, जाहीरपणे कोल्हापूर लोकसभा मतदारसंघाच्या विकासावर थेट चर्चा करू, अशा शब्दांत महायुतीचे उमेदवार खासदार संजय मंडलिक यांनी काँग्रेसचे उमेदवार श्रीमंत शाहू छत्रपती महाराज यांना चर्चेचे जाहीर निमंत्रण दिले.कोल्हापुरातील तपोवन मैदानात शनिवार दि २७ एप्रिल रोजी पंतप्रधान नरेंद्र मोदी यांची जाहीर सभा होणार आहे. या सभेच्या तयारीसाठी आयोजित बैठकी नंतर संजय मंडलिक पत्रकारांशी बोलत होते.यावेळी बोलताना संजय मंडलिक म्हणाले, राजर्षी शाहू महाराजांचा समतेचा विचार दिल्लीत पोहोचवायला आम्ही कटिबद्ध आणि समर्थ आहोत. राजर्षीं शाहू महाराज ही आमचीदेखील अस्मिता आहे. ती आम्ही जपूच पण अस्मिता जपताना आपल्या कर्तव्यात कुठे कसूर होणार नाही, याच भानही प्रतिस्पर्थी उमेदवारांनी राखल पाहिजे. नुसत्याच वारसा हवक्कावर दावा केला जातो आहे. आपल्या ५० वर्षांतील कामाचा लेखाजोखा काही मांडला जात नाही.गादीच्या अपमानाचा कांगावा केला जात आहे; पण प्रत्यक्ष जे कांग्रेस चे उमेदवार आहेत, त्यांनी गादीचा लौकिक वाढावा. राजर्षी शाहूंचा कृतिशील वारसा जपावा, यासाठी काय केले? गेल्या ५० वर्षांत काँग्रेसचे उमेदवार शाहू महाराज यांनी विविध क्षेत्रांत काय कार्य केले आणि खासदार म्हणून आपण केलेले काम याबाबत खुली चर्चा करूया, असे आवाहन यावेळी बोलताना महायुतीचे उमेदवार संजय मंडलिक यांनी केले.
