प्रतिनिधी :जानवी घोगळे
कोल्हापूर प्रतिनिधी -पांडुरंग फिरींगे: देशातील दुग्ध व्यवसाय आणि प्रक्रिया उद्योग क्षेत्रासाठी सर्वात मोठा समजला जाणारा “फीड्‌स टेक आणि डेअरी इंडस्ट्री एक्स्पो २०२५” चिंचवड, पुणे येथील ऑटो क्लस्टर प्रदर्शन केंद्रात उत्साहात सुरू झाला आहे. तीन दिवस चालणाऱ्या या एक्स्पोमध्ये देशभरातील दुग्ध उद्योगाशी निगडित संस्था, संशोधक, तंत्रज्ञ, उद्योजक आणि शेतकरी सहभागी झाले आहेत.
या प्रतिष्ठित एक्स्पोचे उद्‌घाटन ‘गोकुळ दूध संघाचे’ चेअरमन नविद मुश्रीफ यांच्या हस्ते झाले. यावेळी पुणे जिल्हा सहकारी दूध संघाचे चेअरमन ॲड. स्वप्निलजी ढमढेरे, गोकुळचे कार्यकारी संचालक डॉ. योगेश गोडबोले, जाफा फीड्सचे कार्यकारी संचालक डॉ. अमिया नाथ, पारस न्यूट्रिशनचे गणेश शर्मा, तसेच बेनिसन मीडियाच्या प्राची अरोरा व आनंद गोरड यांच्यासह विविध मान्यवर उपस्थित होते.
२०१६ मध्ये सुरू झालेल्या या एक्स्पोने दुग्ध क्षेत्रात अल्पावधीतच राष्ट्रीय पातळीवरील महत्त्वाची ओळख निर्माण केली आहे. या एक्स्पोमध्ये पशुखाद्य तंत्रज्ञान, दूध प्रक्रिया, गुणवत्ता नियंत्रण, पॅकेजिंग, थंड साखळी, ऊर्जा बचत आणि ऑटोमेशन यासारख्या विषयांवरील नवकल्पना प्रदर्शित केल्या जात आहेत.
गोकुळचा ‘शेतकरी मार्गदर्शन स्टॉल’ आकर्षणाचा केंद्रबिंदू
या एक्स्पोमध्ये ‘गोकुळ दूध संघा’तर्फे उभारण्यात आलेला विशेष स्टॉल शेतकऱ्यांच्या विशेष आकर्षणाचा विषय ठरला आहे. या स्टॉलमध्ये गोकुळच्या संतुलित पशुखाद्य उत्पादने, हर्बल पशुपुरक पदार्थ, तसेच दूध उत्पादनवाढीसाठी योग्य पोषणाचे महत्त्व याविषयी माहिती देण्यात आली. गोकुळच्या अधिकाऱ्यांनी शेतकऱ्यांना आहार नियोजन, खाद्य निवड आणि व्यवस्थापनाविषयी मार्गदर्शन केले.
उद्‌घाटनावेळी बोलताना चेअरमन नविद मुश्रीफ म्हणाले,
“दुग्ध व्यवसाय हा ग्रामीण अर्थव्यवस्थेचा कणा आहे. शेतकऱ्यांचा विकास साधायचा असेल, तर नव्या तंत्रज्ञानाचा वापर आणि वैज्ञानिक दृष्टी आवश्यक आहे. संशोधन, गुणवत्ता नियंत्रण आणि नवोन्मेष यांच्या माध्यमातूनच शेतकऱ्यांचे उत्पन्न वाढवता येईल. गोकुळ नेहमीच शेतकऱ्यांच्या हितासाठी कार्यरत राहिला आहे, आणि या एक्स्पोमधील सहभाग हे त्याचे उदाहरण आहे.”
एक्स्पोदरम्यान विविध तांत्रिक सत्रे, कार्यशाळा आणि चर्चासत्रांचे आयोजन करण्यात आले असून, तज्ञ शाश्वत दुग्ध व्यवसाय, ऊर्जा बचत, आधुनिक तंत्रज्ञान आणि गुणवत्तावृद्धी यावर मार्गदर्शन करत आहेत. या माध्यमातून शेतकऱ्यांना नवीन ज्ञान, बाजारपेठेच्या संधी आणि नव्या तंत्रज्ञानाची ओळख मिळत आहे.
एक्स्पोमुळे सहकार क्षेत्र आणि शेतकऱ्यांच्या प्रगतीला नवी दिशा आणि ऊर्जा मिळेल, असा विश्वास उपस्थितांनी व्यक्त केला.
